بے شکلے لہو دی بولی
بے شَکَلے لہو دی بولی — ساڈے لہو دے نال بنڑائیاں گئیاں تجریدی پینٹگاں اج وی شہر دی ہر سر کڈھویں تھاں تے ٹنگیاں ہوئیاں نیں پچھلے سال دی نموش اچ سب تو چوکھی بولی ہک مسیت نے لائی سی بوہے توں محراب تے محراب توں اچے منار اُتے ٹنگے لاؤڈ سپیکر تک ! ہر پاسے کھلرے ہوئے لہو دی پکار سی اوس لہو دی تجرید اچ ساڈے جثے دا انگ انگ ہک بجھارت وانگ لک گیا سی تے کیمرے دی اکھ نیں بتیرا زور لایا پر اخباراں دے مدیر فرنٹ پیج تے ساڈی شکل نہ چھاپ سکے ایہہ ہک نئیں ہر سال دی کہانڑی ایں ایہہ ہر سال دی وی نئیں لوکا ! — ایہ تے ہر دیہہ دی کہانڑی ایں روز ساڈے لہو دی بولی لگدی اے تے روز ساڈے لہو دا سودا کیتا جانداے پر اج تک ساڈی ( سِدھی تے اسان ) جئی شکَل کوئی وی نئیں پچان سکیا ۔ — توقیر رضا